[ مدخل ]
كون المشهد في الصورة جميل لا يعني بالضرورة جمال الصورة
مساء الخير / صباح الخير ..
و لله في ذلك حكمة , من ربع ساعة مسكر الماث ! شكل المادة فيها شيء أو انا الي فيني ..
و أحسكم تقولون وش هاللي دراسته كلها ماث في ماث خخخخخخ لا بس حظكم ما اجي الا و انا أذاكره :(
امس نزل جدول اختباراتنا , الكلاب طبعاً حاطين لنا اسبوعين بس لـ 8 مواد غير المادة الاضافية بتصير 9 يعني !!
قسموها على هالاسبوعين :s أنواع القرف و الضغط و كل مادة يبي لها أقل شي يومين للمذاكرة ..
اختباراتي تبدأ السبت الجاي مع المدارس :@:@:@ ما ادري متى بيلغون هالنظام :@ ليه ما نبدا مع الجامعات مثل خلق الله !
عاد أنا من قبل لا ينزل الجدول كنت احوس بالرياضيات و بكرا ببدأ بإدارة العمليات , مادة غثيثة تسد النفس و طويلة ..
الله يعيين / أحتاج دعواتكم عن ظهر قلب الله يسعدكم : )
و بخصوص المذاكرة و سيرتها , تذكرت رد سبق و نزلته بتفاصيل .. كان بعنوان ( ذكرى للمستقبل )
يا سرع الأيام !
-
طبعا مو هذا محور حديثي بس لازم أفرغ طاقاتي عشان أقدر اعطي طاقات موجبة لكم صح ولا ؟
بتكلم عن نقطة بالتصوير رافعة ضغط واحد من الربع اسمه مشاري الدغريري <- كيف حالك ابو الميش ! ض1
مشاري صديق تصوير و زميل دراسة .. يستشيرني بكل صورة و انا نفس الشيء و الحمدلله نستفيد من خبرات بعض
قبل أمس اتوقع جاني بالمسن يوريني صورة صورها بماليزيا , الصورة تفتح النفس و لو هي عندي وريتكم اياها كان تخقون
المكان جداً جداً رايق و مريح للعين و شلالات من هنا و هناك و الخضار مغطي الأرض !
يعني جنة الدنيا بالخلاصة , مدحتها له كـ طبيعة و صورة لتخليد الذكرى و تستاهل انها تنحفظ بجدارة أكيد ..
قال طيب وش رايك أنزلها بقطر فوتو أكيد بيخقون و بتصير صورة الأسبوع و كان متحمس مرة , قلت لا ما اضمن لك ابد
استغرب مني ! يعني توني أمدح و احط و اشيل خخخخخخخ و الحين حطمت آمآله .. قلت مكان الصورة توب بس الصورة لا !
عاد ابو الميش طنقر على صراحتي ض1 ياخي وش تبيني اسوي ؟ أكبر راسك على الفاضي ؟ يجي النقد مني ولا من الغريب !
الفكرة الي ابي أوصلها لكم , اختصرتها بالمدخل : )
يعني مشاري المكان كان مجهز له و التوقيت بطل , ما عليه الا يضبط الاعدادات و يختار العدسة المناسبة و ترايبود و صوّر ..
بس راح عن باله هالشيء و اهتم بجمال المكان أكثر
-
عسى ما اخذت من وقتكم شيء بس ؟
اعتبروها فاصلة :$ يلا شاركتكم بريك مذاكرتي وش تبون اكثر بعد ؟
ليست هناك تعليقات:
إرسال تعليق