السبت، 21 أغسطس 2010

11/9

فجر الخير على اهل الخير ..

من زمان ما تكلمت و كتبت مايجول بخاطري ( مسوي فيها اديب مايستغني عن الفصحى ) D:

هالفترة صاير أغث نفسي بأمور تافهة جداً , بس تعرفون اللي ودكم تعرفون شي بس بالاخير راح تنغث حتى لو عرفته ؟
كذا وضعي قسم بالله صار الوضع متأزم لدرجة اني كل ما انغثيت رحت اكب عشاي عند خويي محمد خخ
لين الرجال زهق و قال انت موسوس و تحب المغثة و درج .. إلخ ( شتم شتم وش تبون يعني ) !
بس احس الأمر مو بيدي خلاص تأقلمت يومياً كذا , اروح اسوي كذا وكذا عشان اعرف و بالاخير اكل تبن ^_^

مشكلتي اذا بكتب مايجول بخاطري ما اكتب الا اذا صرت معصب او طفشان :/
معليش تحملوني , اذا مافرغت هنا وين افرغ ( اعزز لنفسي ) ..

-
صح انا ما حطيت رابط يومي حق رمضان ؟
و الله نسيت , حياكم
http://vb.eqla3.com/showthread.php?t=681789

الجمعة، 13 أغسطس 2010

عَبرة

فِيْ حُظوركَ أنتْ .. أتَسائلْ مَنْ هُم البّشرْ .. مَنْ هَؤُلآء أمَامُكَ ؟
أشْفَقُ لِحالهِمْ كَثيِراً , يَعتقِدُونْ أنّ الحَياة تَتوّقفْ فَقطْ بِغيابهمْ .!
لا يَعلْمُونْ بِإنّ " حَياتِيْ أنَا " فَقطْ هِيْ مُلْكُكَ ..
تَتوّقفْ الحَياةْ حِينمَا تَذهَبْ و يَتشّردُ ألْف إحْسَاس , و يَتُوهْ ألْف نَبضْ !!
ع . إلَمْ أُدركُ مَعنىْ " الفَقدْ " الا حِينمَا أعْبَثُ بالمَاضِيْ و أخُصّ مِاضِيكَ أنت :/
أتسَائلُ دَائماً , بِمَاذا سَوف أُواجِهُكَ حِينمَا نّلتقِيْ ؟
هَلْ سأسْرُد عَليك الاسْئِلَة .. لَماذا فَعلْت و لِماذا قُلتْ ؟
أم سأسْرُد عَليك الكَثيرْ مِن الاتّهامَاتْ ؟
كلاّ . . حِينمَا نَلتّقِيْ سَوفَ أسْتوّطِنُ قَلبُكْ , و أجْعلُه ملْكٌ " لَنا فقط " !
لَنْ أُطيِلُ عَليكَ العِتابْ , صدّقنِيْ فَقطْ سَوف أحْتَضِنُكَ ..
أَعِدُكْ بإنّيْ لَنْ أتمرّدُ كَثيراً , وَ بِالمُقَابِلْ فَقطْ ... تعودْ : )

الأربعاء، 11 أغسطس 2010

1/9

مساء الخير .. صباح الخير

تقبل الله من الجميع ان شاء الله
كيف اول يوم معاكم ؟ , لا تقولون ان حالكم من حالي :/
اهلي حاطين كل ما لذّ و طاب بس للأسف كان معنا ناس معكرين الفطور !!
احنا طريقة فطورنا زي الاغلبية , نحط كل شي بسفرة وحدة للحريم و الرجال
سوآء فيه حريم اخواني او ما فيه ..
لذلك بعد ما اجتمعنا ع السفرة و اذّن , بدا يذّن ولد اخوي :/ عكر علي الفطور و كرهت السفرة باللي فيها
انسان بثر مزعج بكل ما تعنيه الكلمة ( ابد ماهو ولد اخوي ترى :D ) !

قلت دام ان السالفة كذا و زحمة بزران بدق على اخوياي يجون عشان اكمل فطوري معهم خخخ
و منها ندردش و بعدين نطلع نصلي سوا ^_^

عاد واحد منهم يقول تم و الباقين انتظر منهم الاوكي ...

بمناسبة الايام , تراني حاجز بأحدى المنتديات يوم 7 رمضان عشان اعيشكم جو يومي :$
خليكم قريبيين لأني بنزل الرابط هنا :)


دعواتكم و لا تكثرون مسلسلات بس شوفوا زوارة خميس :P

الأحد، 8 أغسطس 2010

التصوير الفوتوغرافي ( تجربة شخصية ) ج3

باك

زي ما وعدتكم بخصوص الروابط المفيدة ..

هذا موضوع مفيد لمعالجة الصور بشكل بسيط و مرتب
http://vb.eqla3.com/showthread.php?t=312823

و هذا موضوع مفيد لطريقة العزل ( للي متعقد هههههه )

http://www.vb.eqla3.com/showthread.php?t=412104

و هذا الموضوع القمة هو خاص لـ جميع عدسات كانون , شرحها من الالف - الياء !

http://www.adigicam.com/vb/showthread.php?70141-عدسات-كانون-من-الألف-الى-الياء-..وستصبح-خبير-بها

فعلاً اشكر الاخو صاحب الموضوع ( نايس مان ) على جهده الواضح ..

و اي رابط راح يفيدكم برجع اضيفه ان شاء الله :)

الجمعة، 6 أغسطس 2010

عندما ابدأ بقراءة كتاب جديد ..اذهب لآخر صفحةٍ فيه !!
أتعلم ما سر ذلك ؟
* لأنني رجلٌ لا احب المفاجأة :)

الثلاثاء، 3 أغسطس 2010

التصوير الفوتوغرافي ( تجربة شخصية ) ج2

مساء الخير جميعاً
خبرتكم اني هالمرة بتكلم عن انواع التصوير و العدسات بس لأن وقتي ما يسمح لذلك بتكلم عن انواع التصوير و المرة الجاية عن العدسات :)

-
للتصوير انواع كثيرة , لازم أي مصور يشوف نفسه هو مبدع بأي نوع !
مو يجي يقول ابي ابدع بالمجال الفلاني , لأن لكل شخص ميول اكيد ^_^

مثلاً الستريت الفوتوغرافي
يعني تصوير الحياة العامة , زي الشوارع و الناس و ما إليها ..

و تصوير البورترية يعني تصوير الاشخاص و طقتهم

و تصوير الماكرو يعني الاشياء الصغير تكبر ( قل قسم )
يعني تصوير الحشرات الصغيرة و النباتات الصغيرة و إلخ

و تصوير اللآند سكيب يعني تصوير الطبيعة مثل المزارع و الاراضي و الجبآل و إلخ

و تصوير الستيل لايف يعني الحياة الصامتة مثل كاس موية مع خلفية بيضا ( تحسون ماعندي الا هالمثال خخ )
او وردة و خلفية حلوة و ما إليها

و تصوير التطويق يعني التركيز على الهدف و ترك البقية يعني اممممم
بتصور سيارة بالطريق و هي ماشية بسرعة , تصورها و يكون الطريق مشوّش و غير واضح

تقريباً هذا اللي ببالي والله ..

احلى مجال جربته هو تصوير الحياة العامة , مجال روعة و له معاني كثيرة
بشكل اوضح يطلع اللي بخاطرك كله و يرضيك بالنتائج ^_^

و مجال الماكرو رهيب بس للحين ما تعمقت فيه , شريت العدسة و للحين ما مخمخت عليها بشكل جدّي !
اما مجال اللاند سكيب ما يجذبني أبداً , يمكن لأن ما عندنا اماكن تفتح النفس خخخ ( ملينا من صور الصحرا ترى )

و نجي لمجال البورترية و هذا ينقسم لـ قسمين
" داخلي " , " خارجي " ! , الداخلي يعني بالاستوديو و الخارجي يعني العكس اكيد :)
الداخلي ما يشدني كثير يمكن لأن ماعندي موديلز كثير الا اطفال و بثريين ( حلوة الصراحة ! )
الخارجي اسهل بكثير من الدآخلي بس برضو تحتاج اضائة و عاكس و غيره ..
و الغالب يعتقد ان مجال البورترية اسهل مجال مع اني اشوفه اصعب مجال
يحتاج لـ إتقان و توزيع اضائة + موديلز مناسب لفكرة الصورة + مكان مناسب و خلفيات .!
صح ان أي صورة لأي شخصيّة تعتبر بورترية لكن صورة عن صورة تفرق , و الاتقان غير التجربة صح ولالا ؟!

لذلك على المصور يشوف نفسه هو مبدع بأي مجال عشان يخوضه بكل مافيه مو يجلس يجرب و تروح الموهبة على تجارب

بخصوص مجال التطويق فهو المجال الوحيد اللي مافكرت اخوض فيه , بصراحة ماشوفه سهل بس ان شاء الله اذا طوّرت عدّتي بجربه
و كل هالمجالات ممتعة و أي مجال مُرتبط بالتصوير اكيد بيكون حلو ( بديت اخق مع نفسي خخ ) ..

كلامي هذا مختصر طبعاً لأن لكل مجال اساسيات , المرة الجاية بحط لكم روابط تفيدكم بهالشيء :)

دعواتكم لي بالتوفيق