السبت، 31 يوليو، 2010

التصوير الفوتوغرافي ( تجربة شخصية )

السلام عليكم و الرحمة

دائماً أدوّن هنا أشياء خاصة فيني , و تعبر عني و للأمانة اشوف الراحة بالكتابة هنا !
يمكن لأنها صفحة خاصة فيني و محد مشاركني فيها و يمكن لأن ما احد يعلق كثير , ليه كتبت و وش معنى و إلخ
يعني فقط تكتب و غيرك يقرآ : )

هالمرة بدوّن شيء عام و عل و عسى انه يفيدكم و بالاخير أي شيء يطلع مني فهي وجهة نظر
و الكتاب باين من عنوانه !

بتكلم شوية عن المجال الفوتوغرافي , طبعاً هو محيط ما له نهاية و انا للحين ما صرت قطرة بهالمحيط
كنت انجذب لهالمجال كثير , بس العجز كان ملغي الهواية كأي شاب خليجي يسحب على هواياته ! :D
قبل لما ادخل مواقع متخصصة بهالمجال الاقي مصطلحات غريبة جداً و اغلبيّتها بالانجليزي ( يقولون اني رايح اخذ تقوية بإيرلندا !! :D )
فتحصلوني اتجاهل بعض المصطلحات و اقول هذا مو مهم و ذاك اهم و كأني خبير و انا ماعندي الا الدجة بوقتها والله خخخ

لما راح عني الكسل و شريت كاميرة محترمة احترافية من كانون , صرت جاد بهالمجال كثير
و متحمس جداً جداً , حماس ما كنت متوقعه مني شخصياً !
فصرت ادخل على المواقع بس عشان اشوف وش المصطلحات الصعبة و اللي لازم اعرفها
لأن بالنهاية هي أُسس التصوير , و محد راح يمشي بمجال الا وهو عارف أُسسه اكيد : ) < حرف السين مقرف بكلمة اساس :/
المهم بعد ما عرفت المصطلحات و اساسيات التصوير , اعتبرت نفسي ببداية الطريق رغم اني كنت استعمل كاميرة رقمية بسيطة من سوني
بس كنت استعملها على عماي و لا اعرف فيها الا زر البآور و الزوم خخ :D

طيب بقولكم وش المصطلحات اللي عرفتها معرفة تامة و استفدت منها و تمكّنت منها بفضل الله

OPTICAL ZOOM
و بالعربي يعني التقريب البصري !

هو الزوم الخاص بالعدسة نفسها , يتحكم فيها المصور عن طريق عدسته دون تدخل الكاميرة
يعطيك زاوية عريضة و الزاوية العريضة بأسس التصوير يُسمى Wide Angle !
و على فكرة التقريب البصري لا يقلل من جودة الصورة ابداً و هالكلام من تجربة
يعني عكس التقريب الرقمي , التقريب الرقمي شيء بشع جداً يحرمك من جودة الصورة و يمحي لك تفاصيلها :/ < كنت دلخ استخدمه

طيب خلصنا من التقريب البصري الجميل ؟

نجي لشيء أجمل
FOCAL LENTH
و بالعربي البعد البؤري
و هالكلمة متكررة دائماً بهالمجال , لما يجيك نقد على صورة يقولك البعد البؤري عندك مو مضبوط او بيمدح و يقول بعدك خطير و إلخ
طيب وش البعد البؤري ؟ , قوة التقريب على الهدف او قوة التكبير و كل ما زدت قربك للهدف زاد البعد البؤري :)

تقريباً هذي مصطلحات عامة و واردة كثير بين المصورين و الهاويين !
طيب فيه مصطلحات عامة و واردة , لكنها تتعلق بالمصور نفسه

اولها
ISO
مصطلح بثر جداً , مسبب أزمة لي و لكثير من المبتدئيين والله
طيب وش هالبثر ؟ , هو اختصار لهالجملة International Standards Organisation : )
طيب هالطويلة وشي ؟ هي المنظمة الدولية للمقاييس ( بدينا ندخل بالسياسة حقت التصوير :D )
طيب وش يفييد المصور فيه ؟ يفييده بأشياء كثيرة والله
مثلاً احد المصورين او المصورات بمكان مظلم و شاف شي شدّ انتباهه , يبي يصوره بس الظلام مانعه و غير كذا مايبي يستخدم الفلاش لأنه شي بشع جدا ( نتكلم عنه بنقطة لحال :/ )
وش يسوي وقتها ! , يرفع كمية الآيسو لحد ما يبيّن الهدف , يعني نقدر نقول انه يعطيك ضوء كافي لتصوير الهدف
بس مافيه شي مفيد الا و يضر خخخ ( حاله من حال العلاجات الله يحمينا ) , يحبب لك الصورة احياناً
لذلك يفضل انك ترفعه لكمية 400 او 800 كحد أقصى و بيعطيك ضوء يرضيك ان شاء الله ^_^ ..

WHITE BALANCE
بالعربي موازنة البياض او التبييض

هذي ميزة قوية متوفرة بالكاميرات الرقمية و ما يحتاج لها شرح , يعني توزن لك الالوان
عشان تعطيك صورة طبيعية بدون زيادة ولا نصب :D
يعني اذا بتصور حديقة مايمديك تنصب علينا وتقوي لون الخضار بالزرع , الا بالفوتوشوب عاد :D

DEPTH OF FIELD
بالعربي عمق الميدان

و هذا مصطلح بثر مثل ISO , و مرتبط بفن العزل بعد
يعني بتصور قارورة و اللي ورا القارورة ناس قاطين او مكان يفشل او ودك تسوي حركة كشخة بالصورة , هالميزة بتخدمك
بتصور لك الهدف مع عزل الخلفية ^_^
يمديك تقلل من عمق الميدان او تزيد منه بتحكمك بفتحة العدسة :)

و فيه كلمة ثانية واردة كثيرة , بهالمجال و بأشياء كثيرة و بكلامنا العادي بعد

الفوكس , نقطة التركيز على الهدف يعني مثلاً بتصور وجه شخص بس تبي يكون الفوكس على عيونه و تبي ملامح وجهه تطلع !
وش الحل ؟
نركز فتحة العدسة على العيون و بنفس الوقت راح يكون الوجه طالع , يعني اللي بيشوف الصورة بيركز على العيون اكثر من الملامح الثانية
و هالشيء ما يندرج تحت مُسمى عزل ترى :D لحد يغلط بينهم

تقريباً هذي المصطلحات اللي تمكنت منها و ان شاء الله بتمكن من أشياء كثيرة بهالمجال

-
طيب الحين اللي بيشوف هالمصطلحات و يقرآ عنها بيتوقع ان التصوير شي صعب و يبي له دراسة و إلخ !
التصوير صح يبي له دقة و مخ مفتوح دايم و خيال وآسع بس ابداً مو صعب على اي شخص

و لا احد يستهين بأي شيء صوّره , لأن المصور ما يلتقط أشياء عبث ابداً و هذي ميزة لصالح المصورين :)

من الممكن انك تصور كاس موية مع خلفية بيضاء , يجيك شخص ماقد مسك كاميرة و يضحك عليك
وش مصور الحمدلله والشكر كاس موية ؟ :S خلصت الافكار يعني ؟ :S

و بنفس الوقت صورتك هذي تشارك بها بمسابقة فوتوغرافية , و تاخذ صورتك المركز الاول !
يعني إذا تبي تستمر بمجالك اللي تحبه لا تشاور فيه احد الا ناس ثقة و لها خبرة بنفس مجالك و فعلاً تبي لك التطوّر
و ترى مو كل من نقد صار نقده بمحله ^_^

* نقطة اكرهها جدا جدا , لما اصور صورة و يجيني شخص يعيبها و يقول الاضائة مدري وش فيها
و زاويتك كنها مايلة و إلخ
طيب انت فاهم و حاب من قلب تنقد , عطني حلول مع نقدك يعني قول ارفع الاضائة لدرجة كذا و كذا او استخدم اضائة النوع الفلاني
عدل من الزاوية وخلها بالوسط و هكذا ..


و كلامي يختصر بهالحِكمة " الكاميرا لا تصنع الصورة بل المصور من يصنعها "

فيه فترة ثانية بتكلم عن انواع التصوير و عن العدسات ان شاء الله
بالتوفيق لكم و لا ابي منكم الا الدعوات

الجمعة، 16 يوليو، 2010

بدل ضائع

ارى دُمية في أسفل السرير , مرميّة و مظهرهآ قديم و لونها باهت و لها عدة اجزاء
رأس / عينُ دون الاخرى / يدٌ دون الآخرى / و البقية مُكتمل !
و أرى طفلة تعبث بكمية من الدُمى , سليمة و مكتملة تمام الكمال ...
و في اليوم التالي بكت تلك الطفلة , بكائها كان مؤلم و لم يفسّر !!
دنوت منها شيئاً فشيئا و سألتها لِم تلك الدموع ؟ , أجابت بكل تعبّر و نظرات يأس , و تمتمت الدُّمى اختفت !
فحينما يأست و لم تجد للدُّمى أثر , بدأت تبحث عن بديل ...
و سقطت عينها على تلك الدُّمية الشاحبة / الناقصة , فـ احتضنتها
فتجاوزت مرآحل البكاء و دَنت لمراحل الفرحة ..
( ربما الكمآل يبكي الأعين , و النقصان يضحك الأعين , و ربما كلاهما يخونون الأعين * )
و اللّبيبُ بالأشارة يفهمُ

الجمعة، 9 يوليو، 2010

هذا قطارك ؟
................ لحظة بستوعبه غيابك !

الاثنين، 5 يوليو، 2010

in Ireland

يسعد لي صباحكم بكل خير
من زمان ما كتبت بالمدونة :/ و جد اشتقت اكتب و اكتب و عسى يمديني اخلص خخخخ
اول شيء مبروك لنفسي وللكل العطلة ( ادري انه بدري )
ثاني شيء ودي بقوة اعرف كم معدلي , يقال انه طلع بس حالياً ماني بالرياض و لا ودي اعرفه و انا مسافر :D دلاخة

طلعت من الرياض فجر السبت رايح لـ ايرلندا ع اساس آخذ لغة زي ماقلت قبل !
والحمدلله وصلت لها بالسلامة , الاجواء طيبة بس للحين ما تأقلمت و ما احس براحة زي ما كنت متوقع
و شكلي بقطع المعهد الاسبوع الجآي , مو دجة مني ولا شيء والله بس واعد الاهل بسفرية ثانية لباريس
و المطار يقولون قدمنا حجزكم مدري وش السبب :D حسبي الله عليهم كنت مرتب كل شيء على موعد محدد
بس يالله خيرة عساها ..


عاد امس اللي هو يوم الاثنين كان بايخ جدا و بارد ( بارد يعني ممل مو براد جو :D ) !
طلعت للمعهد و للأسف ان بالكلاس معي جزائري محومن كبدي للنهاية , مهايطي بشكل فظيع و بثر الله يهديه :/
معكر ابو جوي تقريباً , المهم اول ماوصلت ماكان فيه احد الا ثلاثة اشخاص ..
الجزائري و واحد اسباني و اسبانية ! , الاسبانيين حبيبيين بقوة و كانوا كاشخين عشان مباراتهم بالكاس و كذا خخخ
عاد الجزائري ( ياخي قل اسمه و خلصنا :D ) اسمه ناصر جمال احمد < كب عشاه
جلس يقولي : تشوفهم كيف مبسوطين بفريقهم مو احنا طلعنا من بدري قلت اهم شيء انكم دخلتوا المونديال و وصلتوا لمستوى رهيب
( عاد أنا من زمان كان ودي ابربر عن المونديال و محد معطيني وجه )
قال اي مستوى دخيل الله كله لعب بزران ( طبعا يكلمني بلهجته خخخ ) , قلت اهم شيء انكم دخلتوا مو مثل السعودية الله يفشلهم خخخ
قال اه والله انت من السعودية , بغيت اقوله الله من فهاوتك لي يومين معك و توك تدري !
و سكتت ما عاد كلمته و حطيت حيلي بالايفون و هاتك يالعب , و تجيني الاسبانية ما اعرف اسمها عاد عشان اكب عشاها :D
تسألني ما لمحت المشرف يوم جيت و كذا قلت لا والله بس لمحت هالبثر الجزائري :/
و لحقها الاسباني يقول وش تلعب ( كل هذا مترجم < قسم بالله عرفوا :D ) , وقتها كنت العب The Sims عشقي الأبدي
و يوم شافوا اللعبة انبسطوا بقوة شكلهم خاقين معها مثلي خخخ , و هاتك ياللعب لين زبد لنا المشرف و كذا و الحمدلله جت الساعة 1 وطلعت من المعهد
كنت بروح لـ Grafton Street شارع رهيب كله اسواق و محلات , بس ماحصل لأن وقتها نشبوا لي خواتي الا بيروحون معي
( ماقلت لكم ان اهلي معي صح ؟ :D طيب عرفتوا الحين )
انا من قبل لا اسافر و اقضب التذاكر قايلهم ترى ايرلندا سفرة لي مو دجة لكم ! , بس عاد بنات و جبتوا لهم طاري سوق وش يسكتهم غير تفليس رصيد البنك !
و مارحت فبروح اليوم ان شاء الله معهم و يارب انبسط و يصير اليوم جميل جداً جداً :D

قدامي ساعتين على روحتي للمعهد , برب اشوف فيلم : )