الخميس، 30 ديسمبر، 2010


مساء الخير - صباح الورد


من زمااان مرة ما سولفت لكم هنا , بس والله بالفترة اللي راحت انشغلت و مريت بأشياء كثيرة
ما كان الوضع يشجع للكلام و الدردشة يعني !
بس عاد جاني الالهام ( الاختباري ) خخخخخ , السبت عندي اختبار و طبيعي أتهرب بأي طريقة " يتحجج لعمره "
و للأمانة ما عندي هدف معين من هالكلام ولا عندي سالفة بذكرها بس يلا يقولون سالفة تجر سالفة صح ؟ :d
أمس الربوع طرى لي البر و جو البر و الضوء و الشباب و فلتهم ..
قلت بس ياسعود اقضب الطارة و قداام " اخذت جينات مطعسة منهم " , رحت لهم بالمخيم و كان بعيد
يعني بر ( صدقي ) على قولة يارا خخخخخ , معليش اشطح بكم ؟ :d
تذكرت حلقة ياسر التويجري ببرنامج أبشر خخخخخخخخ يوم نيشان يروح لهم بالبر و يقوله هيدي هو البر !
و يسلك له ياسر يقول لا ذا بر مصغر قريب من الرياض :d
نكمل , المهم رحت لهم و ناوي من قبل لا أطلع اني بنام هناك مع الشباب ..
اول ما وصلت لقيتهم من الفضاوة جايبيين مونوبولي " يا قدمي " و هم بنص اللعبة و الاراضي كلها مشريّة دخلت معهم و فزت " اهايط عليكم شوي "
خلصنا لعب و و فلة جلسنا نتقهوى , كانوا فيه مجموعة رجال ما اعرفهم مرة بس لهم رجل على المخيم و كذا ..
كلهم معرسين و " متعسسيين :d " , و أنا اتقهوى فيني عادة ! لازم اقط اذني مع الي يسولفون حتى لو ما أعرفهم
هذا عيبي الي أفتخر فيه خخخخخخخ وش أسوي يوسعون صدري طيب :d .. واحد منهم اسمه الظاهر ابو راكان
ياهووو حقنه ياهوو بثر ياهوو مدري وش أسميه :/ من يجلس الى ما يطلع وهو يسولف عن حياته الزوجية !!
ودي أقوله استح على وجهك , شنب و حالتك حالة و بمجلس رجاجيل و جالس تسولف لنا عن حياتك مع حرمتك " اهم شي تسولف لنا :$ "
أستحقره كثير هو والي معه , عاد اقول لأخوياي تهقون الزواج يسوي كذا ؟ يعني من كثرة حومة الكبد و التعقيد كل ما جلست تسولف عن مواقف حرمتك :d
يعني أتقبلها من الحريم بس الرجال لا " وكلي ود و احترام لعالم حواء :p " ...
يوم خلصت قطة الاذن بدا الجو يحلوو و النجوم تكثر و محسوبكم شاعري " عطوني جوي " , قلت خل نطلع برا المخيم أشرح لنا من جوا
والله لو كان معي كاميرتي كان صورت لكم جونا , صدق صدق كان يوسع الصدر و يعطي تفاؤل :d
لكن بعز صفو جونا , بدت الذيابة تزعج و تحوم بالبر و اضطرينا نشغل النار برا و ندخل للمخيم ..
و راحت السهرة على لعب سوني و كيرم و بلع و قهوة و بس
كيفني و أنا اسولف لكم سالفة قصيرة و مختصرة ؟ :d هذي بس لعيون الي يقول ( ياكرهي لك سعود أنت بس هاجد و توسوس لنا بهالخواطر ) ..

ليست هناك تعليقات:

إرسال تعليق